Psa 39 | YON | STEP | Yook ambo bi ye karub yeman. Yedutun ye dowad wongkoon. Dewid ye yook. Nembed yedmaan, “Ne dobiri kerekmen kuu nekareb kangkadmaniin, kwane ne weng dakmi yaambed ambarakmain. Arewa kamidaniib ne arinambo ari keraniibbed kuu weng ma dakmainban.” andaan.

Psalms 39

Yook 39

Yook ambo bi ye karub yeman. Yedutun ye dowad wongkoon. Dewid ye yook.

1 Nembed yedmaan, “Ne dobiri kerekmen kuu nekareb kangkadmaniin,
kwane ne weng dakmi yaambed ambarakmain.
Arewa kamidaniib ne arinambo ari keraniibbed kuu
weng ma dakmainban.” andaan.
2 Ne kuu ne mongkodkono kebene iwari kereni,
weng maa ma dakmokban kerimain, weng amun kangkon.
Kwanimain kumban ne mimyob wandi kuu darewoob arimbed keroon.
3 Ne niindem aom kuu nimin denobimaan,
kwane meendobaine amot areb denimaan.
Kwanekori yedmaan,
4 “OYariman, ne aron yimin wandaneen kuu korokbewe.
Kwane, weeb komoyiib ari dobaraniin kangkon korokbewe.
Kwananeeb kuu ne wad dobiri kuu aron dukmenmo yeman ande nekaadkeraniin.” andaan.
5 Kedi, ebbed ne weeb ongmewen kuu kumunkingkaniin kuu dingki mimo angkarambed wene angkara areb kumbedmo,
kwane ne wooneenbed wene bobnaniin ye weeb kuu eb yaambed kuu barang anamban areb miin dukmen mana.
Nimakarub mimim yi dobiri ye weeb kuu eb yaambed kuu inum koni mimo areb kumbedmo.Selah
6 Anam kuu nimakarub dewenebimaib kuu kuruwakmo areb barang darewoobban.
Anam kuu komo komo ambangkimaib kuu ma id kerimokban.
Kwane, yi kuu yiribman yemoon bimaib kumban, ari duknaniiwe yi yiribman kanembed baniib kuu yikaadban.
7 Kwane kowe,Yariman, kibikee komo dowad kereknaniin?
Ne meeni amaan ari kwananeen ande meenaan kuu eb yaamo.
8 Ne ambarakmi korem yaa kuu awaweneb nen angka kowe.
Kwane domowaawe inameniibbandanbed damangkawaib.
9 Ne kuu iwari keraan, ne mongkod dande weng dakmainban,
amborom kuu ke dabab kandaan kee ebka ebbed kwamune ambangkewen kowe.
10 Ebbed ne yaa ukum kawewen kuu kan angkane.
Ne kuu eb dingkimbed woweewe korem yiminban keraan.
11 Ebbed nimakarub yi ambarakmi dowad ongkandeneb didangkimaab,
kwane ebbed yi yiribman kuu amberodbed ane dowan keremoon areb kerundewen.
Nimakarub mimim yi kuu inum koni mimo areb barang miin embeng mana.Selah
12 OYariman, ne kurikuri weng wengambere.
Ne awawe ande baandaan kuu wengambere.
Ne ameng kami yaa kuu kerendem warudki areb keruwaab.
Amborom kuu ne yaa arud wandewen kumbed ne kuu eb yaa owodman areb keraan,
nawoya yiri areb norodman keraan kui.
13 Ne yaa ebbed arud wande indob korarewen kuu womone.
Kwanebko ne angkon ika kuba.
Kwanaabban kuu ne kuu kimyen wene bobnaniin.